Vecia Sagra de Noventa

Bepi Missaglia

Vecia Sagra de Noventa

Folpi caldi, masenete
I marroni grossi bei,
pevarini e le favete,
tiramola par putei.

Nose mandole co’ i fighi.
Pomi cachi bei grossi
Cuchi e cuche, mille intrighi
E de zuca te t’ingrossi.

Mandolato , caramelle,
Masteloni, mastelete,
balosini, girastele
subi pifari e trombette.

Stalo grando per cavai
E custodia biciclette,
vin spinà dentro i bocai:
vegna vin ca semo in sete.

Toni bevi anca ‘sto goto
Pago mi! Mi no ghe bado,
go anca el pan che xè biscotto
co’ na feta de salado.

Tiri a segno co’ i piumini,
tiri a colpi che fa bumm,
tiri a foto co’i balini,
el casoto turuntumm.

Circo equestre co’ la banda,
balo fatto in piantaforma,
una pesca tanto granda,
l’organeto co’ la Norma.

Altalena co’ barchette,
do cavai tacà ‘na rupia,
qua le nove cansonete
e n’armonica che supia.

Xente tanta e tanta ancora,
done, omai, putei
dapartuto: salta fora
come nuvole de osei.

Tuti magna par le strade,
fave nose e castagne,
dispensando le peade
su le piante… pore cagne.

Camminando co’ fa ochi
I se scontra co’ sfiancà,
ma no i bada, perde i tochi
de la roba zà magnà.

I gramofoni sofiosi
I te spaca recie e testa.
Ma i xe i tuti rumorosi,
per passare ‘sta gran festa.

Dopo i torna tuti a casa
Imbriaghi ben pasui
Co’ la pansa sgionfa rasa,
duri strachi co’ fa mui.

Ma contenti par dei mesi
Torno al fogo de polenta,
i pensava ai soldi spesi
a la sagra de… Noventa.